2025-yil 23-may kuni Toshkent shahrida O‘zbekiston Ayollar va Qizlar Uyushmasi hamda O‘zbekiston va Turkiya Ishbilarmonlari Uyushmasi (UTID) hamkorligida tashkil etilgan Turkiyzabon davlatlar ayollar jamoat tashkilotlari xalqaro konferensiyasi bo‘lib o‘tdi. Ushbu muhim tadbir turkiyzabon davlatlar ayollarining o‘zaro aloqalarini mustahkamlash, xalqaro miqyosdagi hamkorlikni rivojlantirish va dolzarb ijtimoiy-iqtisodiy masalalarda fikr almashish uchun samarali maydon bo‘ldi.
Konferensiya Ishtirokchilari
Anjumanda:
- Turli xil xorijiy davlat — jumladan, Fransiya,Turkiya, Ozarbayjon, Qozog‘iston, Qirg‘iziston, Rossiya va boshqa mamlakatlardan tashrif buyurgan ayollar tashkilotlari rahbarlari,
- O‘zbekiston Respublikasi Oliy Majlisi Senati va Qonunchilik palatasi a’zolari,
- Turli vazirlik va idoralarning mas’ul rahbarlari,
- Nodavlat-notijorat tashkilotlari vakillari,
- faol tadbirkor ayollar,
- yoshlar yetakchilari,
- hamda milliy va xalqaro ommaviy axborot vositalari xodimlari ishtirok etdi.
Muqaddas qadriyatlar va zamonaviy imkoniyatlar muhokamada
Konferensiya davomida turkiyzabon davlatlarda ayollarning jamiyatdagi o‘rni, gender tengligi, ta’lim va sog‘liqni saqlash sohalaridagi ishtiroki, siyosiy faolligi, hamda tadbirkorlik va innovatsiyalar sohasidagi yutuqlari haqida fikrlar bildirildi. Har bir delegatsiya o‘z mamlakatidagi tajribalarni taqdim etdi.
Shuningdek, ayollar o‘rtasida madaniy, ilmiy, iqtisodiy va ijtimoiy yo‘nalishlarda hamkorlikni chuqurlashtirish, qo‘shma loyihalarni amalga oshirish, turkiy xalqlarning qadimiy an’analarini asrash va rivojlantirish masalalari alohida e’tiborda bo‘ldi.
Memorandumlar imzolandi
Tadbir yakunida turli tashkilotlar o‘rtasida o‘zaro hamkorlikni yo‘lga qo‘yish, kelgusida ayollar uchun qo‘shma tashabbus va dasturlarni ishlab chiqish maqsadida bir nechta memorandumlar imzolandi. Bu kelgusidagi xalqaro integratsiyaning mustahkam poydevoriga aylandi.
Tadbir doirasida…
- Mehmonlar uchun madaniy dasturlar va milliy hunarmandchilik ko‘rgazmalari tashkil etildi.
- Ayollar yetakchiligi, zamonaviy texnologiyalar, media va ayollar roli mavzularida muhokamalar o‘tkazildi.
Turkiyzabon Davlatlar Ayollar Jamoat Tashkilotlari Xalqaro Konferensiyasi O‘zbekistonning mintaqaviy va global miqyosda ayollar harakatini rivojlantirish borasidagi faoliyatining yana bir muhim bosqichi bo‘ldi. Tadbir ishtirokchilari O‘zbekiston tomonining ochiqligi, tashabbuskorligi va xalqaro ayollar harakatidagi faolligini yuksak baholadilar.